മലയാള സിനിമയെ അമ്പരപ്പിച്ചുകൊണ്ട് നവാഗതരുടെ കരുത്തിൽ പുറത്തിറങ്ങിയ 'വാഴ 2: ബയോപിക് ഓഫ് എ ബില്യൺ ബ്രോസ്' ബോക്സ് ഓഫീസിൽ ചരിത്രം കുറിക്കുന്നു. റിലീസ് ചെയ്ത് വെറും ഏഴ് ദിവസത്തിനുള്ളിൽ ചിത്രം 100 കോടി ക്ലബ്ബിൽ ഇടംപിടിച്ചു.

തിരക്കഥാകൃത്ത് വിപിൻ ദാസും അണിയറ പ്രവർത്തകരും ഒഫീഷ്യൽ ബോക്സ് ഓഫീസ് കണക്കുകൾ പുറത്തുവിട്ടതോടെ മലയാള സിനിമയിലെ ഏറ്റവും വേഗത്തിൽ 100 കോടി കടക്കുന്ന നാലാമത്തെ ചിത്രമെന്ന റെക്കോർഡും 'വാഴ 2' സ്വന്തമാക്കി.

സൂപ്പർതാരങ്ങളുടെ ആഡംബരങ്ങളില്ലാതെ, സോഷ്യൽ മീഡിയയിലൂടെ ശ്രദ്ധേയരായ ഹാഷിർ, അലൻ, വിനായക്, അജിൻ എന്നിവരെ കേന്ദ്രകഥാപാത്രങ്ങളാക്കി നവാഗതനായ സവിൻ എസ്.എ ആണ് ചിത്രം സംവിധാനം ചെയ്തത്. യുവതലമുറയെയും കുടുംബപ്രേക്ഷകരെയും ഒരുപോലെ ആകർഷിക്കാൻ കഴിഞ്ഞതാണ് ചിത്രത്തിന്റെ ഈ അപ്രതീക്ഷിത മുന്നേറ്റത്തിന് കാരണം. മലയാളത്തിൽ 100 കോടി നേട്ടം കൈവരിക്കുന്ന പതിനാലാമത്തെ ചിത്രമാണിത്. മോഹൻലാൽ, പൃഥ്വിരാജ് തുടങ്ങിയ വൻതാരങ്ങളുടെ ചിത്രങ്ങൾക്കൊപ്പം ഈ കുട്ടിപ്പടയും സ്ഥാനം പിടിച്ചത് സിനിമാ ലോകത്തെ ഞെട്ടിച്ചിരിക്കുകയാണ്.

ഏറ്റവും വേഗത്തിൽ 100 കോടി തികച്ച ചിത്രങ്ങളിൽ മോഹൻലാലിന്റെ 'എമ്പുരാൻ' (2 ദിവസം), 'തുടരും' (6 ദിവസം) എന്നിവയ്ക്ക് തൊട്ടുപിന്നാലെ ഏഴ് ദിവസം കൊണ്ട് ഈ നേട്ടം കൈവരിച്ച 'ലോക' എന്ന ചിത്രത്തിനൊപ്പമാണ് ഇപ്പോൾ 'വാഴ'യുടെ സ്ഥാനം. റിലീസ് ചെയ്ത ആദ്യ തിങ്കളാഴ്ച തന്നെ റെക്കോർഡ് കളക്ഷൻ നേടിയ ചിത്രം വിദേശ വിപണിയിലും മികച്ച പ്രകടനമാണ് കാഴ്ചവെക്കുന്നത്. 2026-ൽ മലയാളത്തിൽ നിന്ന് 100 കോടി ക്ലബ്ബിലെത്തുന്ന രണ്ടാമത്തെ ചിത്രമാണിത്; ജയസൂര്യയുടെ 'ആട് 3' ആയിരുന്നു ഇതിന് മുൻപ് ഈ വർഷം ഈ നേട്ടം സ്വന്തമാക്കിയത്. വരും ദിവസങ്ങളിലും ചിത്രം കൂടുതൽ റെക്കോർഡുകൾ തകർക്കുമെന്നാണ് ട്രേഡ് അനലിസ്റ്റുകളുടെ വിലയിരുത്തൽ.