ബോളിവുഡ് താരം സോനാക്ഷി സിൻഹയും തെന്നിന്ത്യൻ താരം ജ്യോതികയും പ്രധാന വേഷങ്ങളിലെത്തുന്ന പുതിയ കോർട്ട് റൂം ത്രില്ലർ 'സിസ്റ്റം' റിലീസിന് തയ്യാറെടുക്കുന്നു. പ്രശസ്ത സംവിധായകൻ അശുതോഷ് ഗോവാരിക്കറും ചിത്രത്തിൽ ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. 'ബറേലി കി ബർഫി' എന്ന ചിത്രത്തിലൂടെ ശ്രദ്ധേയയായ അശ്വിനി അയ്യർ തിവാരിയാണ് ഈ ചിത്രം സംവിധാനം ചെയ്തിരിക്കുന്നത്. മെയ് 22-ന് പ്രൈം വീഡിയോയിലൂടെ ചിത്രം പ്രേക്ഷകരിലേക്ക് എത്തും.

അധികാരവും നീതിയും തമ്മിലുള്ള പോരാട്ടത്തിന്റെ കഥയാണ് 'സിസ്റ്റം' പറയുന്നത്. ഉയർന്ന പദവിയുള്ള പബ്ലിക് പ്രോസിക്യൂട്ടർ നേഹ രാജ്‌വൻശായി സോനാക്ഷി സിൻഹ എത്തുമ്പോൾ, സാധാരണ പശ്ചാത്തലത്തിൽ നിന്നുള്ള സ്റ്റെനോഗ്രാഫർ സരിക റാവത്തായിട്ടാണ് ജ്യോതിക വേഷമിടുന്നത്. വ്യത്യസ്ത സാമൂഹിക ചുറ്റുപാടുകളിൽ നിന്നുള്ള ഇവർ രണ്ടുപേരും അനീതിക്കെതിരെ പോരാടാൻ ഒന്നിക്കുന്നതാണ് ചിത്രത്തിന്റെ ഇതിവൃത്തം. ഹർമൻ ബാവേജ, അരുൺ സുകുമാർ തുടങ്ങിയവരാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്.

പ്രീതി അഗർവാൾ, ആദിനാഥ് കോത്താരെ, ഗൗരവ് പാണ്ഡെ തുടങ്ങിയവരും ചിത്രത്തിൽ അണിനിരക്കുന്നുണ്ട്. അധികാര കേന്ദ്രങ്ങളോട് പൊരുതി സത്യം പുറത്തുകൊണ്ടുവരാൻ ശ്രമിക്കുന്ന രണ്ട് കരുത്തരായ സ്ത്രീകളുടെ കഥയാണ് ചിത്രമെന്ന് നിർമ്മാതാവ് ഹർമൻ ബാവേജ പറഞ്ഞു. ആമസോൺ പ്രൈം വീഡിയോയുടെ ഒറിജിനൽ ചിത്രമായിട്ടാണ് ഇത് റിലീസ് ചെയ്യുന്നത്. നീതിക്കും ധാർമ്മികതയ്ക്കും ഇടയിലുള്ള സംഘർഷങ്ങൾ ദൃശ്യവൽക്കരിക്കുന്ന ഒരു മികച്ച ലീഗൽ ഡ്രാമയായിരിക്കും ഇതെന്നാണ് അണിയറപ്രവർത്തകർ അവകാശപ്പെടുന്നത്.