തെലുങ്ക് സൂപ്പർ താരം അല്ലു അർജുന്റെ ജന്മദിനത്തിൽ ആരാധകർക്ക് ആവേശമായി പുതിയ ചിത്രത്തിന്റെ ടൈറ്റിൽ പ്രഖ്യാപനം. തമിഴ് ഹിറ്റ് മേക്കർ അറ്റ്‌ലി സംവിധാനം ചെയ്യുന്ന ബിഗ് ബജറ്റ് ചിത്രത്തിന് 'രാക' എന്നാണ് പേരിട്ടിരിക്കുന്നത്. ചിത്രത്തിന്റെ ടൈറ്റിൽ പോസ്റ്ററിനൊപ്പം അല്ലു അർജുന്റെ വേറിട്ട ലുക്കും അണിയറപ്രവർത്തകർ പുറത്തുവിട്ടു.

കണ്ണുകളിൽ കരിമഷിയെഴുതി, മൃഗങ്ങളുടേതിന് സമാനമായ കൈനഖങ്ങളുമായി നിൽക്കുന്ന അല്ലു അർജുന്റെ ലുക്ക് സോഷ്യൽ മീഡിയയിൽ ഇതിനോടകം തരംഗമായിക്കഴിഞ്ഞു. താരം ചിത്രത്തിൽ പകുതി മനുഷ്യനും പകുതി മൃഗവുമായ രൂപത്തിലായിരിക്കും പ്രത്യക്ഷപ്പെടുക എന്ന സൂചനയാണ് പോസ്റ്റർ നൽകുന്നത്. ദീപിക പദുകോൺ നായികയായി എത്തുന്ന ചിത്രത്തിൽ വിജയ് സേതുപതി, ജാൻവി കപൂർ, മൃണാൽ താക്കൂർ, കാജോൾ എന്നിവരും പ്രധാന വേഷങ്ങളിൽ എത്തുമെന്ന് റിപ്പോർട്ടുകളുണ്ട്. പ്രശസ്ത തമിഴ് ഹാസ്യതാരം യോഗി ബാബു ചിത്രത്തിൽ ഉണ്ടാകുമെന്ന് നേരത്തെ സ്ഥിരീകരിച്ചിരുന്നു.

സയൻസ് ഫിക്ഷൻ വിഭാഗത്തിൽപ്പെടുന്ന ഒരു വിഷ്വൽ വിസ്മയമായിരിക്കും 'രാക'യെന്നാണ് സൂചനകൾ. ലോസ് ഏഞ്ചൽസിലെ പ്രമുഖ വിഎഫ്എക്സ് സ്റ്റുഡിയോകൾ അല്ലു അർജുനും അറ്റ്‌ലിയും സന്ദർശിച്ചത് സിനിമയുടെ സാങ്കേതിക നിലവാരം വ്യക്തമാക്കുന്നു. സായ് അഭയങ്കർ സംഗീതം നിർവഹിക്കുന്ന ചിത്രം സൺ പിക്ചേഴ്സിന്റെ ബാനറിൽ കലാനിധി മാരനാണ് നിർമ്മിക്കുന്നത്.

തന്റെ സ്വപ്ന പദ്ധതിയാണിതെന്നും ഇന്ത്യൻ സിനിമയിലെ തന്നെ ഏറ്റവും വലിയ ദൃശ്യവിരുന്നുകളിൽ ഒന്നായിരിക്കും 'രാക'യെന്നും അറ്റ്‌ലി മുൻപ് വ്യക്തമാക്കിയിരുന്നു. പുഷ്പ 2-വിന് ശേഷം അല്ലു അർജുൻ ആരാധകർ ഏറ്റവും ആവേശത്തോടെ കാത്തിരിക്കുന്ന ചിത്രമായി ഇതോടെ 'രാക' മാറി. മറ്റ് ഭാഷകൾക്കൊപ്പം മലയാളത്തിലും ചിത്രം റിലീസ് ചെയ്യും.