ആൻഡി വിയറിന്റെ പ്രശസ്തമായ നോവലിനെ ആസ്പദമാക്കി ഫിൽ ലോർഡും ക്രിസ്റ്റഫർ മില്ലറും ചേർന്നാണ് ഈ ചിത്രം സംവിധാനം ചെയ്തിരിക്കുന്നത്. ഭൂമിയിലെ ജീവജാലങ്ങളുടെ നിലനിൽപ്പിന് ഭീഷണിയാകുന്ന വിധത്തിൽ സൂര്യന്റെ ഊർജ്ജം നഷ്ടപ്പെടുന്നത് തടയാൻ ബഹിരാകാശത്തേക്ക് നിയോഗിക്കപ്പെടുന്ന ഒരു ബഹിരാകാശ സഞ്ചാരിയുടെ കഥയാണ് ചിത്രം പറയുന്നത്. 'ദി ഫാൾ ഗൈ' (2024) എന്ന ചിത്രത്തിന് ശേഷം റയാൻ ഗോസ്ലിംഗ് ബിഗ് സ്ക്രീനിലേക്ക് തിരിച്ചെത്തുന്ന ചിത്രം കൂടിയാണിത്.

രണ്‍വീർ സിംഗിന്റെ 'ധുരന്ധർ 2', യാഷിന്റെ 'ടോക്സിക്' എന്നീ ചിത്രങ്ങളുമായുള്ള ബോക്സ് ഓഫീസ് മത്സരം ഒഴിവാക്കാനാണ് ചിത്രത്തിന്റെ റിലീസ് മാറ്റിയതെന്ന തരത്തിൽ നേരത്തെ അഭ്യൂഹങ്ങൾ ഉണ്ടായിരുന്നു. എന്നാൽ 'ടോക്സിക്' ജൂണിലേക്ക് മാറ്റിയതോടെ, മാർച്ചിൽ തന്നെ ചിത്രം പ്രേക്ഷകരിലേക്ക് എത്തിക്കാൻ അണിയറപ്രവർത്തകർ തീരുമാനിക്കുകയായിരുന്നു. ഇന്ത്യക്ക് പുറത്തുള്ള രാജ്യങ്ങളിൽ ചിത്രം മുൻ നിശ്ചയിച്ച പ്രകാരം മാർച്ച് 20-ന് തന്നെ പുറത്തിറങ്ങും.

ഇംഗ്ലീഷിനു പുറമെ ഹിന്ദി, തമിഴ്, തെലുങ്ക് ഭാഷകളിൽ ചിത്രം മൊഴിമാറ്റി പ്രദർശനത്തിനെത്തും. ഐമാക്സ് (IMAX) സ്ക്രീനുകളിലും ചിത്രം ലഭ്യമാകും. സാന്ദ്ര ഹുള്ളർ, ലയണൽ ബോയ്സ്, കെൻ ലിയുങ് തുടങ്ങിയവരും ചിത്രത്തിൽ പ്രധാന വേഷങ്ങളിൽ എത്തുന്നുണ്ട്. ബ്ലൂ സ്‌ക്രീനോ ഗ്രീൻ സ്‌ക്രീനോ ഉപയോഗിക്കാതെയാണ് ചിത്രത്തിന്റെ ഭൂരിഭാഗം രംഗങ്ങളും ചിത്രീകരിച്ചതെന്ന പ്രത്യേകതയും ഇതിനുണ്ട്. ആദ്യ ഘട്ട പ്രതികരണങ്ങൾ പ്രകാരം ഒരു മികച്ച സ്പേസ് ഒഡീസി അനുഭവം തന്നെയാകും ഈ ചിത്രം സമ്മാനിക്കുക.