നല്ല സിനിമകളുടെ ഭാഗമാകണം എന്ന ഉത്തരവാദിത്തബോധമാണ് തന്നെ മുന്നോട്ട് നയിച്ചതെന്നും, ആ ഉത്തരവാദിത്തത്തിന്റെ ഫലമായാണ് നല്ല കഥാപാത്രങ്ങളും സിനിമകളും തന്നെ തേടിയെത്തിയതെന്നും നടൻ മിഥുൻ ജയ് ശങ്കർ. 'ആവേശം' എന്ന ഹിറ്റ് ചിത്രത്തിലെ ബിബി എന്ന കഥാപാത്രത്തിലൂടെ ശ്രദ്ധേയനായ താരം, തമിഴിൽ സൂരിക്കൊപ്പമുള്ള 'മണ്ടാടി', 'ടൂറിസ്റ്റ് ഫാമിലി' തുടങ്ങിയ ചിത്രങ്ങളിലൂടെയും മികച്ച പ്രകടനമാണ് കാഴ്ചവെച്ചിട്ടുള്ളത്.

കഥാപാത്രങ്ങളുടെ എണ്ണത്തേക്കാൾ നിലവാരത്തിന് പ്രാധാന്യം നൽകി കഥകൾ തിരഞ്ഞെടുക്കുന്നതിനെക്കുറിച്ചും, ഒരു അഭിനേതാവെന്ന നിലയിൽ പ്രേക്ഷകരോടുള്ള ഉത്തരവാദിത്തത്തെക്കുറിച്ചും സംസാരിക്കവെയാണ് മിഥുൻ തൻ്റെ നിലപാട് വ്യക്തമാക്കിയത്. സിനിമകളോട് പുലർത്തുന്ന ഈ കൃത്യമായ കാഴ്ചപ്പാടും കഠിനാധ്വാനവുമാണ് ചുരുങ്ങിയ സമയം കൊണ്ട് പ്രേക്ഷകരുടെ പ്രിയങ്കരനായി മാറാൻ താരത്തെ സഹായിച്ചത്.