മലയാളി പ്രേക്ഷകർ ഏറെ ആവേശത്തോടെ കാത്തിരിക്കുന്ന പുതിയ മോഹൻലാൽ-തരുൺ മൂർത്തി ചിത്രത്തിന്റെ ലൊക്കേഷനിൽ നിന്നുള്ള ചിത്രം പങ്കുവെച്ച് നടൻ അജു വർഗീസ്. 'എൽ 366' (L366) എന്ന് താൽക്കാലികമായി പേരിട്ടിരിക്കുന്ന ചിത്രത്തിലെ മോഹൻലാലിന്റെ ലുക്കിനെക്കുറിച്ച് അജു ഇൻസ്റ്റഗ്രാമിൽ കുറിച്ച വാക്കുകൾ ഇതിനോടകം വൈറലായിക്കഴിഞ്ഞു.

"ദേവാസുരത്തിലെ നീലനും നരസിംഹത്തിലെ അച്ചുവുമെല്ലാം മനസ്സിലൂടെ മിന്നി മറഞ്ഞു. പക്ഷേ കാത്തിരിക്കാം വേറെ തന്നെ ഒരു വരവിനായി. എൽ366 ഷൂട്ടിങ്. ഒരു തരുൺ മൂർത്തി ലാലേട്ടൻ ചലച്ചിത്രം" എന്നാണ് മോഹൻലാലിനൊപ്പമുള്ള ചിത്രം പങ്കുവെച്ചുകൊണ്ട് അജു കുറിച്ചത്. തരുൺ മൂർത്തിയും മോഹൻലാലും ഒന്നിച്ച 'തുടരും' എന്ന സൂപ്പർ ഹിറ്റ് ചിത്രത്തിന് ശേഷം ഇരുവരും വീണ്ടും ഒന്നിക്കുന്ന ചിത്രം കൂടിയാണിത്.

ആഷിഖ് ഉസ്മാൻ പ്രൊഡക്ഷൻസിന്റെ ബാനറിൽ ആഷിഖ് ഉസ്മാൻ നിർമ്മിക്കുന്ന ഈ ചിത്രത്തിന്റെ തിരക്കഥ ഒരുക്കുന്നത് രതീഷ് രവിയാണ്. ചിത്രത്തിൽ ഒരു പോലീസ് ഉദ്യോഗസ്ഥന്റെ വേഷത്തിലാണ് മോഹൻലാൽ എത്തുന്നതെന്നാണ് സൂചനകൾ. തൊടുപുഴയിലാണ് നിലവിൽ സിനിമയുടെ ചിത്രീകരണം നടക്കുന്നത്. മീര ജാസ്മിൻ നായികയായി എത്തുന്ന ചിത്രത്തിൽ മനോജ് കെ. ജയൻ, ജഗദീഷ്, ഇർഷാദ് തുടങ്ങി വലിയൊരു താരനിര തന്നെയുണ്ട്.

ആദ്യ ഭാഗമായ 'തുടരും' വലിയ വിജയമായതിനാൽ തന്നെ തരുൺ മൂർത്തി-മോഹൻലാൽ കൂട്ടുകെട്ടിൽ നിന്നുള്ള രണ്ടാമത്തെ ചിത്രത്തിലും ആരാധകർക്ക് വലിയ പ്രതീക്ഷയാണുള്ളത്. മോഹൻലാലിന്റെ പുതിയ ഗെറ്റപ്പ് കണ്ടതോടെ പഴയകാല മാസ്സ് റോളുകളുടെ ഓർമ്മ പുതുക്കുകയാണ് സോഷ്യൽ മീഡിയ. പാൻ ഇന്ത്യൻ തലത്തിൽ ശ്രദ്ധിക്കപ്പെടുന്ന ചിത്രമായിരിക്കുമിതെന്ന് അണിയറ പ്രവർത്തകർ അവകാശപ്പെടുന്നു.