മലയാളത്തിന്റെ പ്രിയ സംവിധായകൻ പ്രിയദർശൻ ബോളിവുഡിൽ ഒരുക്കുന്ന പുതിയ ത്രില്ലർ ചിത്രം 'ഹൈവാന്റെ' ഫസ്റ്റ് ലുക്ക് പോസ്റ്ററുകൾ പുറത്തുവിട്ടു. സൂപ്പർതാരങ്ങളായ അക്ഷയ് കുമാറും സെയ്ഫ് അലി ഖാനും കേന്ദ്രകഥാപാത്രങ്ങളായെത്തുന്ന ചിത്രം ഒരു സൈക്കോളജിക്കൽ ഇൻവെസ്റ്റിഗേഷൻ ത്രില്ലറാണ്. മോഹൻലാലിനെ നായകനാക്കി പ്രിയദർശൻ തന്നെ സംവിധാനം ചെയ്ത് വൻ വിജയമാക്കിയ മലയാള ചിത്രം 'ഒപ്പ'ത്തിന്റെ ഔദ്യോഗിക റീമേക്കാണ് ഈ ചിത്രമെന്നാണ് റിപ്പോർട്ടുകൾ സൂചിപ്പിക്കുന്നത്.

അക്ഷയ് കുമാറും സെയ്ഫ് അലി ഖാനും നീണ്ട 17 വർഷങ്ങൾക്ക് ശേഷമാണ് വീണ്ടും വെള്ളിത്തിരയിൽ ഒന്നിക്കുന്നത്. 2008-ൽ പുറത്തിറങ്ങിയ 'തഷാൻ' എന്ന ചിത്രത്തിലാണ് ഇരുവരും അവസാനമായി ഒരുമിച്ച് അഭിനയിച്ചത്. ചിത്രത്തിൽ കാഴ്ചയില്ലാത്ത എന്നാൽ ആയോധനകലകളിൽ സമർത്ഥനായ ഒരു കഥാപാത്രത്തെയാണ് സൈഫ് അലി ഖാൻ അവതരിപ്പിക്കുന്നത്. 'ഓരോ ഇന്ദ്രിയവും ഒരു ആയുധമാണ്' എന്ന കുറിപ്പോടെയാണ് സെയ്ഫിന്റെ തീവ്രതയാർന്ന പോസ്റ്റർ പങ്കുവെച്ചിരിക്കുന്നത്. അതേസമയം ഇരുളിൽ മറഞ്ഞിരിക്കുന്ന ലുക്കിലുള്ള അക്ഷയ് കുമാറിന്റെ പോസ്റ്റർ 'പ്രതികാരം എല്ലാം കാണുന്നുണ്ട്' എന്ന ടാഗ്‌ലൈനോടെയാണ് എത്തിയത്. ഇരുവരുടെയും പോസ്റ്ററുകൾ ഇതിനോടകം തന്നെ സോഷ്യൽ മീഡിയയിൽ വലിയ ചർച്ചയായിട്ടുണ്ട്.

ബോമൻ ഇറാനി, സയ്യാമി ഖേർ, ശ്രിയ പിൽഗോങ്കർ എന്നിവരും പ്രധാന വേഷങ്ങളിലെത്തുന്ന ചിത്രത്തിൽ മോഹൻലാൽ ഒരു അതിഥി വേഷത്തിൽ എത്തുമെന്നും സൂചനകളുണ്ട്. കെ.വി.എൻ പ്രൊഡക്ഷൻസിന്റെയും തെസ്പിയൻ ഫിലിംസിന്റെയും ബാനറിൽ വെങ്കട്ട് കെ. നാരായണയും ശൈലജ ദേശായി ഫെന്നും ചേർന്നാണ് ചിത്രം നിർമ്മിക്കുന്നത്. കൊച്ചി, വാഗമൺ, ഊട്ടി, മുംബൈ തുടങ്ങിയ സ്ഥലങ്ങളിലായി ചിത്രീകരണം പൂർത്തിയായ പ്രിയദർശന്റെ ഈ 99-ാമത് ചിത്രം 2026 സെപ്റ്റംബർ 11-ന് ലോകമെമ്പാടുമുള്ള തീയേറ്ററുകളിൽ പ്രദർശനത്തിനെത്തും.