മലയാളി പ്രേക്ഷകർ ഏറെ ആകാംക്ഷയോടെ കാത്തിരുന്ന ജയറാം-കാളിദാസ് ജയറാം ചിത്രം 'ആശകൾ ആയിരം' ഒടിടി സ്ട്രീമിങ്ങിന് ഒരുങ്ങുന്നു. ഇന്ന് (ഏപ്രിൽ 17) മുതൽ പ്രമുഖ ഒടിടി പ്ലാറ്റ്‌ഫോമായ സീ ഫൈവിലൂടെ ചിത്രം പ്രേക്ഷകരിലേക്ക് എത്തും. തിയേറ്ററുകളിൽ മികച്ച പ്രതികരണം നേടിയ കുടുംബചിത്രം രണ്ടു മാസത്തെ കാത്തിരിപ്പിന് ശേഷമാണ് ഡിജിറ്റൽ പ്ലാറ്റ്‌ഫോമിൽ റിലീസ് ചെയ്യുന്നത്.

നീണ്ട 23 വർഷങ്ങൾക്ക് ശേഷം യഥാർത്ഥ ജീവിതത്തിലെ അച്ഛനും മകനും വെള്ളിത്തിരയിൽ ഒന്നിച്ചെത്തുന്നു എന്നതാണ് ചിത്രത്തിന്റെ ഏറ്റവും വലിയ പ്രത്യേകത. 'ഒരു വടക്കൻ സെൽഫി' എന്ന സൂപ്പർ ഹിറ്റ് സിനിമയ്ക്ക് ശേഷം ജി. പ്രജിത് സംവിധാനം ചെയ്ത ഈ ചിത്രത്തിൽ, ജീവിതത്തിന്റെ രണ്ടറ്റം കൂട്ടിമുട്ടിക്കാൻ കഷ്ടപ്പെടുന്ന ഹരിഹരൻ എന്ന അച്ഛനായി ജയറാം എത്തുമ്പോൾ, സിനിമയെ സ്വപ്നം കാണുന്ന മകനായി കാളിദാസും വേഷമിടുന്നു. ജയറാമിന്റെ വേറിട്ട പ്രകടനവും കുടുംബ ബന്ധങ്ങളുടെ വൈകാരിക തലങ്ങളും സിനിമയെ ശ്രദ്ധേയമാക്കിയിരുന്നു.

പ്രശസ്ത സംവിധായകൻ ജൂഡ് ആന്തണി ജോസഫും അരവിന്ദ് രാജേന്ദ്രനും ചേർന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. ആശാ ശരത്, ഷറഫുദീൻ, ഇഷാനി കൃഷ്ണ, രമേശ് പിഷാരടി, ആനന്ദ് മന്മഥൻ എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നുണ്ട്. ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലനും കൃഷ്ണമൂർത്തിയും ചേർന്നാണ് ചിത്രം നിർമ്മിച്ചത്.

ഫെബ്രുവരി ആറിന് തിയേറ്ററുകളിൽ റിലീസ് ചെയ്ത ചിത്രം ബോക്സ് ഓഫീസിലും സാമാന്യം നല്ല പ്രകടനം കാഴ്ചവെച്ചിരുന്നു. 'വിന്റേജ് ജയറാം' മോഡലിലുള്ള കഥാപാത്രത്തെ വീണ്ടും ബിഗ് സ്ക്രീനിൽ കാണാനായതിന്റെ സന്തോഷത്തിലായിരുന്നു ആരാധകർ. തിയേറ്ററുകളിൽ സിനിമ കാണാൻ സാധിക്കാത്തവർക്കും വീണ്ടും ആസ്വദിക്കാൻ ആഗ്രഹിക്കുന്നവർക്കും വരാനിരിക്കുന്ന ഒടിടി റിലീസ് വലിയൊരു ആശ്വാസമാകും. സീ ഫൈവ് മലയാളം പ്ലാറ്റ്‌ഫോമിലൂടെ ലോകമെമ്പാടുമുള്ള മലയാളി പ്രേക്ഷകർക്ക് ചിത്രം ലഭ്യമാകും.