സൈജു കുറുപ്പ് കേന്ദ്ര കഥാപാത്രമായെത്തുന്ന പുതിയ ക്രൈം ഇൻവെസ്റ്റിഗേഷൻ ത്രില്ലർ ചിത്രം 'ആരം' സിനിമയുടെ ട്രെയിലർ പുറത്തിറങ്ങി. പ്രേക്ഷകരിൽ കൗതുകവും ആകാംക്ഷയും നിറയ്ക്കുന്ന മികച്ചൊരു ത്രില്ലർ അനുഭവമായിരിക്കും ചിത്രമെന്ന സൂചന നൽകുന്നതാണ് ഇപ്പോൾ പുറത്തുവന്ന ട്രെയിലർ.

ഒരു പൊലീസ് ഉദ്യോഗസ്ഥന്റെ വ്യക്തിജീവിതത്തിലും ഔദ്യോഗിക ജീവിതത്തിലും ഉണ്ടാകുന്ന അപ്രതീക്ഷിത സംഭവവികാസങ്ങളും, അതിനെത്തുടർന്ന് നടക്കുന്ന സങ്കീർണ്ണമായ കേസ് അന്വേഷണവുമാണ് ചിത്രത്തിന്റെ പ്രധാന പ്രമേയം. മനഃശാസ്ത്രപരമായ വശങ്ങൾ കൂടി ഉൾപ്പെടുത്തിയാണ് കഥ മുന്നോട്ട് പോകുന്നത്. സൈജു കുറുപ്പിന്റെ ശക്തമായ അഭിനയ മുഹൂർത്തങ്ങൾ ചിത്രത്തിലുണ്ടാകുമെന്നാണ് ട്രെയിലർ നൽകുന്ന സൂചന.

പരസ്യരംഗത്ത് പ്രശസ്തനായ രാജേഷ് പരമേശ്വരനാണ് ചിത്രം സംവിധാനം ചെയ്യുന്നത്. വിഷ്ണു രാമചന്ദ്രന്റേതാണ് തിരക്കഥ. ഗുഡ് ഹോപ്പ് പ്രൊഡക്ഷൻസിന്റെ ബാനറിൽ ഡോ. ജുനൈസ് ബാബുവാണ് ഈ ചിത്രം നിർമ്മിച്ചിരിക്കുന്നത്.

സൈജു കുറുപ്പിന് പുറമേ അസ്കർ അലി, സിദ്ദിഖ്, അഞ്ജു കുര്യൻ, സുധീഷ്, ഉണ്ണി ലാലു, മനോജ് കെ.യു., മീര വാസുദേവ്, ഷാഹീൻ സിദ്ദിഖ്, ഗോകുലൻ തുടങ്ങിയ വലിയ താരനിര തന്നെ ചിത്രത്തിൽ അണിനിരക്കുന്നുണ്ട്. ജിത്തു ദാമോദർ ഛായാഗ്രഹണവും വി. സാജൻ എഡിറ്റിങ്ങും നിർവ്വഹിക്കുന്നു. രോഹിത് ഗോപാലകൃഷ്ണനാണ് ചിത്രത്തിന്റെ സംഗീത സംവിധാനം. സെപ്റ്റംബറോടെ ചിത്രം തിയറ്ററുകളിലേക്ക് എത്തുമെന്നാണ് പ്രതീക്ഷിക്കുന്നത്.