ജാഫർ ഇടുക്കി പ്രധാന കഥാപാത്രത്തെ അവതരിപ്പിക്കുന്ന ‘ആമോസ് അലക്സാണ്ടർ’ -ന്റെ ട്രെയിലർ നടൻ ടൊവിനോ തോമസ് തന്റെ സോഷ്യൽ മീഡിയ ഹാൻഡിലുകൾ വഴി പുറത്തിറക്കി. ‘ഞാനൊരു പ്രവാചകനല്ല, പ്രവാചക പുത്രനുമല്ല… ഞാൻ ഒരു ആട്ടിടയനാണ്.’ എന്ന് തുടങ്ങുന്ന ജാഫർ ഇടുക്കിയുടെ ഡയലോഗോടുകൂടിയാണ് ട്രെയിലർ ആരംഭിക്കുന്നത്.

പൂർണ്ണമായും ഡാർക്ക് ക്രൈം ത്രില്ലർ വിഭാഗത്തിൽ പെടുന്ന ഈ ചിത്രത്തിന് കഥയും സംവിധാനവും അജയ് ഷാജിയാണ് നിർവഹിച്ചത്. മഞ്ചാടി ക്രിയേഷൻസിന്റെ ബാനറിൽ അഷറഫ് പിലാക്കൽ നിർമ്മിച്ച ചിത്രം നവംബർ 14-ന് തീയറ്ററുകളിലെത്തും.

ഒരു മാധ്യമപ്രവർത്തകനായിട്ടാണ് അജു വർഗീസ് ചിത്രത്തിൽ പ്രത്യക്ഷപ്പെടുന്നത്. തന്റെ ജോലിക്കിടെ ആമോസ് അലക്സാണ്ടറിനെ കാണുന്ന ഇയാൾ പിന്നീട് നേരിടുന്ന അതിശയകരമായ സംഭവങ്ങളാണ് സിനിമയുടെ പ്രമേയം. അതിശക്തവും അസാധാരണവുമായ ആമോസ് അലക്സാണ്ടർ എന്ന കഥാപാത്രത്തെ ശക്തമായ ഡയലോഗുകളിലൂടെ ജാഫർ ഇടുക്കി അത്ഭുതകരമായി അവതരിപ്പിച്ചിരിക്കുന്നു.

ചിത്രത്തിലെ നായികയായി മോഡലും നാടക നടിയുമായ താര അമല ജോസഫ് എത്തുന്നു. മാധ്യമപ്രവർത്തകയായ നായികയുടെ വിവിധ സംസ്ഥാനങ്ങളിലൂടെയുള്ള അന്വേഷണയാത്രയും അതിനിടെ കാണുന്ന വിസ്മയകരമായ ദൃശ്യങ്ങളുമാണ് ട്രെയിലറിലൂടെ പ്രത്യക്ഷപ്പെടുന്നത്. രാജ്യത്തെ 14 സംസ്ഥാനങ്ങളിലൂടെയുള്ള യാത്രയും അവിടങ്ങളിലെ ദൃശ്യസൗന്ദര്യവും ചിത്രത്തിന്റെ പ്രധാന ആകർഷണങ്ങളാണ്.

കലാഭവൻ ഷാജോൺ, ഡയാന ഹമീദ്, സുനിൽ സുഗത, ശ്രീജിത്ത് രവി, അഷറഫ് പിലാക്കൽ, രാജൻ വർകലയ, നാദിർഷ എന്നിവർക്കൊപ്പം നിരവധി പുതുമുഖ താരങ്ങളും ചിത്രത്തിൽ പ്രധാന വേഷങ്ങളിൽ എത്തുന്നു.